Inrugin dagiti opisyales ti siudad a mangikkat kadagiti premature campaign materials a nagwaras iti aglawlaw ti City of Pines.
Iti panakiuman ti Bombo Radyo kenni John Rhey Mananeng, Sangguniang Kabataan (SK) Federation President ti siudad, kinunana a nangipasa dagitoy ti resolusyon maipapan iti panakaikkat dagiti premature campaign materials kadagiti kalkalsada, rangtay kasta met kadagiti nakasabit kadagiti luglugan gapu ta daytoy ket panaglabsing iti Ordinance 33-2012 a mangiparparit kadagiti politiko wenno anya man a personalidad a mangikarga kadagiti nagnaganda kadagiti parapubliko nga imprastraktura.
Sigun kenni Mananeng, agbalbalin nga estratehiya dagiti politiko ti panangisabit wenno panagipaklat kadagiti greetings wenno pagnagkablaaw, panagballaag ken safety trips dagitoy kadagiti publiko no pay kasta no kitaen dagiti poster dagitoy ket mas dakdakkel ti panakaimprinta ti rupa ken nagan dagitoy no idilig iti panagkablaawda.
Impeksa ni Mananeng a dagiti nasao a poster ket mabalin a mangipasimudaag iti panagtaray dagiti nasao a personalidad iti paumay nga eleksyon.
Ngem awan pay laeng met ti filling of candidacy ket immuna metten a nakaplastar dagiti nagnaganda kadagiti kakalsada.
Kinuna ni Mananeng a kangrunaan met a nag-ikkatanda kadagiti premature campaign materials ket ti pauneg iti Sablan, sadiay Longlong, Kennon Road, ken Marcos Highway.
Kabayatanna, kinuna ti Sangguniang Kabataan Federation President ti Baguio City a
no adda pay dagiti saan a naik-ikkat a premature campaign material ket mabalin nga ikkaten dagitoy ti publiko.//
