BAGUIO CITY – Umap-apela ita ti maysa a kooperatiba dagiti mannalon ken negosyante iti La Trinidad Vegetable Trading Post a mailaksid iti travel requirements dagiti drivers ken pahenante dagiti cargo trucks a dumaldalyasat kadagiti border checkpoints.
Kinuna ni Agot Balanoy, General Manager ti Highland Farmers Multipurpose Cooperative a saan a kasapulan a mangiparang iti full vaccination card wenno negatibo nga RT-PCR test result dagiti vegetable truckers kadagiti checkpoint kas maitunos iti “no touch down policy” ti La Trinidad, Benguet.
Inlawlawagna a saan nga agdis-dissaag manipud kadagiti trucks dagiti drivers ken helpers dagitoy agsipud ta dagiti komboy ti mangikarkarga wenno mangidisdiskarga kadagiti nateng.
Innayonna pay a kaaduan kadagiti purchasers ket agnanaed sadiay La Trinidad, Benguet.
Inaklon met ni Balanoy a saan pay a nabakunaan ti kaaduan kadagiti drivers ken pahenante agsipud ta ur-urayenda paylaeng ti iskediul dagitoy iti sidong ti A5 category.
Kinunana a saan a praktikal no inaldaw a maipasidong iti antigen testing dagiti truckers bayat nga ur-urayenda ti panakabakunada.
Malaksid iti daytoy, kidkidawenna kadagiti awtoridad a maipaayanda pay iti makalawas a pawayway seknan iti nasao a polisiya tapno mapakamuan dagiti masekan.
Kabayatanna, inwaragawag ni Balanoy a killaat bimmaba idi napan a lawas ti wholesale price ti repolyo iti P50. 00tunggal kilo manipod iti sigud a P70.00 tunggal kilo kalpasan a kinanselar dagiti buyers ti ginatangda a nateng gapu ta saanda a napalubosan a lumabas iti checkpoint sadiay Puyupoy Tuba , Benguet.
