BAGUIO CITY – Ituloy ti Department of Agriculture (DA) nga agpuonan iti farm-to-market roads (FMRs) ken mangilatangda iti dakkel a pondo para kadagiti nasao a kalsada iti probinsia ti Benguet.
Dinakamat ni Agriculture Secretary William Dar nga iti P24-B a nailatang a pondo ti ahensia manipud iti Bayanihan 2 ket adda ti P5-B a nailatang para iti FMRs.
Kinunana a napateg unay ti Benguet gaputa daytoy ti pagtataudan ti 80-85 percent iti suplay ti nateng iti entero a pagilian isut gapuna a nasken a protektaran ti DA ti probinsia ken ti industriya ti nateng.
Inyunay-unayna a napateg dagiti kalsada iti naparpartak a panakaibiahe dagiti produkto a nateng gaputa maiyasideg dagiti pagmulaan kadagiti vegetable trading centers.
Imbingayna a ti arapaapda ket ti direkta a panangilako dagiti kooperatiba dagiti mannalon kadagiti nateng dagitoy sadiay Metro Manila ken saanen a dumalan pay iti trading areas iti La Trinidad.
Sigun pay kenni Sec. Dar, napateg dagiti kalsada kas kadagiti farm-to-market roads iti panagdur-as dagiti ili, pakairamanan dagiti lugar nga apektado iti panagrebelde.
Maipalagip nga idi laeng napalabas a lawas ket indauluan ni Sec. Dar ti panakaipaima ti P202-M a gatad ti farm-to-market roads sadiay Atok iti provincial government.
