Agbalbalin a pakaseknan dagiti delivery riders ti pagpakingan sadiay Session road nangruna ket saan a mabalin ti agpark sadiay DBP area gapu iti manarimaan a konstrukyon kasta met iti Lower Mabini ken Perfecto gapu ta ti prayoridad ket dagiti building tenants wenno building owners.
Iti panakiuman ti Bombo Radyo kenni Daryll Kim Longid, Chief ti Public Order and Safety Division, kinunana nga idi tawen 2019 ket adda ti insingasingna nga addang para iti parpakingan dagiti riders.
Daytoy ket sadiay Mabini asideg ti skyworld no sadino adda ti maipaay a lima nga slot a saan a kasapulan nga agbayad dagiti riders bayat a ti maysa a solusyon ket ti panagbayad dagiti riders iti P20 iti intero nga aldaw ngem rumbeng ti strikto panakaimplementar ti “drop and go.”
No pay kasta, kinuna ni Longid a narigat ti implementasyon daytoy nangruna ket saan a nalaka ti panakabigbig dagiti talaga a delivery riders gapu ta saan laeng a dagiti box dagitoy ti basaran.
Nagbalin met a karit iti Public and Order Safety Division ti kinakurangda iti personnel tapno maimplementar ti nasao a singasing.
Iti nasao a pakaseknan, suhestiyon ni Longid ti panakaingato ti delivery fee dagiti produkto ken ti panakaipaay ti at-atidog a time frame kadagiti riders nga agtaud wenno paturong sadiay Session road tapno saan a malugi dagiti riders.
Kabayatanna, impakaamo ni Longid nga inton Huwebes ket manamnama ti panakisinnarakna iti traffic and transportation and technical working group tapno pagtalantananda ti mabalin a solusyon iti nasao a parikut ti siudad ti Baguio.
Nu pay kasta, impaganetget ni Longid a kadagiti wagas wenno solusyon a maimplementar para kadagiti delivery riders, rumbeng ti panagbalin a disiplinado dagitoy tapno maipatungapal dagiti addang a nasaysayat.//Bombo Mera Pacpacan
