BAGUIO CITY – Saan a ninamnama ti provincial government ti Mountain Province ti panakapasidong ti probinsia iti Alert Level 4 idi kalman.
Imbinglay daytoy ni Governor Bonifacio Lacwasan Jr. iti panakiuman ti Bombo Radyo Baguio kenkuana.
Sigun kenkuana, nupay saanda a ninamnama ti baro nga alert level ket sigud metten a pinagsaganaanda daytoy gapu kadagiti nagbalin a kapadasanda iti napalpalabas a bulan a panakailet dagiti pagalagadan sadiay kontra iti COVID-19.
Kinunana a nakasagana metten dagiti Temporary Treatment and Monitoring Facilities sadiay, pakairamanan dagiti agserbi a kanayonan nga isolation facilties.
Umaw-awatda metlaeng kadagiti job orders a health workers nga agserbi kadagiti pagagasan partikular kadagiti pasiente ti COVID-19.
Patienna pay a ti killaat a panagngato ti kaso ti COVID-19 sadiay Mountain Province ti rason iti panakaipasidongda iti Alert Level 4.
Naamuan a dimmanon iti 542 ti aktibo a kaso sadiay bayat a dimmanon iti 81.41% ti Healthcare Utilization Rate ti probinsia manipod kadagiti lima nga pagagasan sadiay.
Dinakamat pay ti gobernador a ti killaat a panagbalbaliw ti klima a mapaspasaran ita sadiay ti maysa a kitkitaenda a rason iti panagngato ti kasoda iti COVID-19 gaputa adu dagiti makapaspasar ti panateng.
Nupay kasta, mamati daytoy a saan pay a nakastrek sadiay Mountain Province ti Omicron variant iti baet ti panagngato ti kasoda iti COVID-19.
