BAGUIO CITY – Ur-urayen ita ti lokal a gobyerno ti La Trinidad, Benguet ti desisyon iti kaso nga impilada kontra iti developer ti maysa a land development sadiay Piripin Bato iti Barangay Pico para iti panakaipaulog ti Temporary Environmental Protection Order.
Sigun kenni Mayor Romeo Salda, malaksid iti nasao a kaso ket adda metten ti cease and desist order a naipaulog tapnu saanen nga ituloy ti Pines City Doctors Hospital, Incorporated ti proyekto daytoy iti nasao a disso nangruna ta awanan dagitoy ti Development Permit.
Kinunana nga adda metten ti rekomendasyon ti EMB-Cordillera para iti panakaisardeng ti patrabaho ken ti panagaramid ti developer kadagiti mitigating measures.
Immuna iti daytoy, naisayangkat ti joint inspection kadagiti ar-aramiden ti developer a mitigating activities iti proyekto daytoy kalpasan a naduktalan a ti proyekto ti nagtaudan dagiti pitak a naglayos iti deppaar ti Kilometer 3 ken Kilometer 4 idi napalpalabas a lawas bayat ti nepnep gapu iti kaawan ti napintas a drainage system ti proyekto.
Innayonna pay a nakikoordinarda metten iti DPWH para iti panaka-aramid ti drainage canal iti deppaar ti Kilometer 4 tapnu saanen a maulit pay ti panaglayos sadiay nangruna no panagtutudo.
