BAGUIO CITY – Maisubli ti pedestrianization wenno ti panakairikep ti Session Road kadagiti motorista tunggal aldaw ti Dominggo.
Sigun kenni Mayor Benjamin Magalong, babaen iti daytoy ket maipaayan gundaway dagiti restaurants a mangakomodar kadagiti kliyenteda agingga iti ruar ti pasdekda para iti open-air dining.
Inladawan met ni City Tourism Officer Engr. Alec Mapalo a ‘safer experience’ daytoy kadagiti kliyente gaputa maobserbaran ti panagdistansia wenno panagiinnadayo.
Innayonna a mabalin pay a maadal ti panakaipalubos dagiti buskers kadagiti kalkalsada ti siudad.
Maipalagip nga iti pedestrianization ti Session Road ket mairikep kadagiti motorista ti dua a linya ti nasao a kalsada tunggal aldaw ti Dominggo.
Maitunos ti kaudian nga addang ti lokal a gobyerno iti kampanya daytoy para iti in-inot, natalged ken sigurado a panagsubli dagiti aktibidad iti siudad a mangpadur-as iti ekonomiya iti baet ti agdama a pandemya.
