BAGUIO CITY – Naipabiangen kadagiti lokal a gobyerno iti probinsia ti Benguet ti desisyon no maituloy wenno saan ti limited face-to-face classes kadagiti pagadalan iti masakupan dagitoy.
Inwaragawag daytoy ni Benguet Schools Division Superintendent Gloria Buya-ao kasaruno ti panakaipasidong ti probinsia iti Alert Level 3 nga agpaut agingga iti ngudo ti agdama a bulan.
Kinunana a mangamongen dagiti lokal a gobyerno nga agdesisyon nangruna ta dagitoy ti maka-ammo iti sitwasyon iti lugarda, partikular iti kinatalged dagiti ubbing ken mannursuro.
Maipalagip nga iti agdama ket ti laeng Naguey Elementary School ken Ja’pa Elementary School nga agpada a masarakan sadiay Atok, Benguet ti pakaipatpatungpalan ti limitado a face-to-face classes iti probinsia.
Sigun kenni Buya-ao, binilinna metten ti panakikoordinar ti Public Schools District Supervisor ti Atok iti lokal a gobyerno ti munisipyo mainaig iti nasao a pakaseknan.
Innayonna a saan metlaeng a matuloy ita a bulan ti nakiddaw a panakailaylayon ti limited face-to-face classes dagiti dadduma a pagadalan iti probinsia.
Impettengna a dakkel a tulong ti limitado a face-to-face classes ngem nasken met a maipangruna latta ti seguridad dagiti ubbing ken dagiti mannursuro.
