BAGUIO CITY – Naragsak dagiti alumni wenno cavaliers ti Philippine Military Academy (PMA) iti panangipalubos ti akademya a maaddaan manen ti aktibidad sadiay.
Impeksa daytoy ni Armed Forces of the Philippines Chief of Staff Andres Centino kagiddan ti panangkunana a dakkel a panagyamanda iti panakaituloy ti tinawen nga alumni homecoming.
Sigun kenkuana, daytoy nga aktibidad ti PMA ti padpadaanan unay dagiti amin nga alumni ti akademya.
Nagyaman pay daytoy iti naawatna nga Outstanding Achievement Award a sigun kenkuana ket mangipakpakita iti panangbigbig ti alma matter dagitoy iti naaramidanda iti adu a tawenda iti serbisyo.
Ni General Centino ket miembro ti PMA Class of 1988.
Kabayatanna, inladawan met ni PBGen. Leo Francisco nga arigna nagsubli daytoy iti kina-kadete iti panagsarungkarda manen iti akademya.
Ni PBGen. Francisco ket miembro ti PMA Class of 1992 ken Cavalier Awardee kas Head Investigator ti CIDG.
Kabayatanna, iti met social media, impeksa ni Senator Ping Lacson a kandidato iti kinapresidente iti masungad nga eleksion ti panagyamanna iti PMA iti panangbigbig daytoy kadagiti tawenna iti serbisyo publiko.
Saan met a personal a dimmar-ay ni Presidente Rodrigo Duterte iti Philippine Military Academy (PMA) Alumni Homecoming, no sadino, ti presidente ti commander-in-chief ti Armada Pwersa ti Pilipinas.
Nupay kasta, imbagi daytoy ni Defense Secretary Delfin Lorenzana a nagturpos iti premier military academy kas paset ti PMA MAAGAP Class of 1973.
Iti mensahe ti presidente, impeksana ti panagkablaawna kadagiti alumni ti PMA kagiddan ti panangbigbigna iti adu a naar-aramidan dagitoy iti panangprotektar kadagiti Pilipino manipud iti nagduduma a pangta iti kappia ken seguridad.
Impeksana pay ti tarigagayna a babaen iti nasao nga aktibidad ket maaddaan manen dagiti alumni iti napabaruan a ‘sense of patriotism’ ken gagar nga agserbi.
Kabayatan ti aktibidad, naipaayan ti Lifetime Achievement Awards kadagiti alumni wenno cavaliers a da Anselmo Avelino Jr. ti Class 1967, Melchor Rosales ti Class 1968; Edgar Aglipay ti Class 1971 ken ni Senator Panfilo Lacson ti Class 1971.
Naipaay pay ti Cavalier Award kadagiti 14 nga alumni, pakairamanan ni Baguio City Mayor Benjamin Magalong ti Class 1982 gapu iti naisangsangayan a naaramidan dagitoy iti agdama a posisyonda.
