BAGUIO CITY – Binukelen ti Police Regional Office Cordillera (PROCOR) ti Provincial Special Investigation Task Group a mangtutok iti imbestigasyon ken panakarisut ti kaso a panakapalpaltog ti maysa a American-Chinese national nga agserserbi a rights advocate, journalist ken paralegal volunteer sadiay Ifugao.
Nakaro a nadangran ni Brandon Lee, 37-anyos ken residente ti Tungngod, Lagawe, Ifugao kalpasan a pinalpaltogan daytoy ti saan pay a nabigbig a gunmen idi rabii ti Lunes, August 5.
Napasamak ti pammaltog iti sangwanan ti pagtaengan ni Lee kalpasan a sinukonna ti anakna iti pagadalan dagitoy.
Dagus a naitaray iti pagagasan ni Lee a nagsagrap ti uppat a tama ti bala ti paltog.
Sigun kenni PBGen. Israel Ephraim Dickson, regional director ti PROCOR, iwanwan ni PCol. Mafelin Bazar, deputy regional director for operations ti PROCOR ti nasao a task force para iti napartak a panakarisut ti kaso ni Lee.
Kinunana a nainget met a konkondinarenda ti nasao a panakapalpaltog ni Lee a paralegal volunteer ti Ifugao Peasant Movement.
Umap-apela met daytoy kadagiti makaipaay iti impormasyon iti panakikoordinarda iti pulisya para iti panakarisut ti kaso.
