BAGUIO CITY – Pagsagsaganaan ita ti City Tourism Office ti panangrambak ken dagiti aktibidad ti siudad ti Baguio para iti umadani a Christmas season.
Sigun kenni City Tourism Officer Engr. Aloysius Mapalo, matuloy ti panakapasilaw dagiti dekorasyon para iti Paskua ken ti Christmas Tree ti siudad inton December 1.
Kinunana a mai-recycle dagiti Christmas lanterns tapnu makainot ti siudad gaputa adu ita dagiti paggastusan. dagitoy
Dinakamatna a rinugianda metten nga isimpa dagiti centerpiece decorations sadiay Malcom Square.
Sigun kenkuana, mangrugi iti Malcom Square ti panakasindi dagiti Christmas decorations ti siudad pasang-at agingga iti Christmas Tree sadiay Upper Session Road.
Innayonna nga adu pay dagiti sorpresa nga aktibidad ken programa nga isagsaganada para kadagiti umili ti siudad ken kadagiti bisata.
Dinakamatna nga ad-adalenda ita no mabalin a maipatungpal ti lantern parade nga awan ti maikompromiso a health protocol.
Innayonna a maysa kadagiti nasken a padaanan ti publiko ket iti agbalin a disenyo ti Giant Christmas Tree a maimuntar iti upper session road.
Kinuna pay ni Engr. Mapalo a ti saan laeng a maipatungpal ket ti Christmas Village a sigud a maipatpatungpal iti Rose Garden tapnu maliklikan ti panagu-urnong dagiti tattao.
Nupay kasta, dinakamatna latta a kitaenda ti posibilidad a maipatungpal ti nasao nga aktibidad.
