![](https://img.bomboradyo.com/baguio/2021/08/3rd-quarter-NSED-scaled.jpg)
BAGUIO CITY – Aw-awisen ti Office of Civil Defense (OCD) – Cordillera ti panakipaset dagiti umili ti rehion iti Third Quarter Online Nationwide Simultaneous Earthquake Drill (NSED) a maangay iti alas-otso ti agsapa inton September 9.
Iti interview ti Bombo Radyo Baguio, kinuna ni OCD-Cordillera Information Officer Harold Lising nga uray adda dagiti umili iti uneg ti pagtaenganda ket mabalinda latta a makipaset iti nasao nga aktibidad, partikular ti panakaisayangkat ti “duck,cover and hold”.
Kinunana nga ikagkagumaanda ti panakaisayangkat ti NSED tapnu agbalin a paset ti katatao ti tunggal maysa ti agbalin a disaster resilient wenno addaan ti abilidad a maka-adaptar ken makarekober manipud iti aniaman a kalamidad kas iti gingined.
Impettengna a ti gingined ket maysa a seryoso a pasamak a nasken a dagus a maaksionan babaen iti panagbalin a naridam ken sisasagana.
Inyunay-unayna a ti disaster resiliency ket agrugrugi iti pamilya, iti barangay wenno komunidad agingga iti entero a rehiyon ken iti pagilian ken no maaramid daytoy ket maragpat ti puntirya ti NSED a panagbalin ti Pilipinas a maysa a disaster resilient country.
Kabayatanna, impasigurado ni Lising nga amin a makipaset iti NSED iti Baguio ken Benguet a napili a national pilot area ti aktibidad ket naipasidong iti COVID-19 test ken agaramat dagitoy ti personal protective equipments.
Innayonna a makita iti aktibidad no kasano nga agresponde dagiti ahensia ti gobyerno iti insidente ti gingined iti baet ti manarimaan a pandemya gapu iti COVID-19.
Aw-awisenda metlaeng dagiti stakeholders ti pribado a sektor iti panakipaset dagitoy iti aktibidad tapnu masurwan dagiti personnel dagitoy iti nasken a maaramid no adda ti mapasamak a gingined iti rehion.