BAGUIO CITY – Linawlawagan ti maysa kadagiti convener ti The Kasiyana: Youth in Action-Tulong Kabataan Network in Cordillera a nangorganisa iti community pantry sadiay Igorot Park a saan nga amin a miembro ti grupoda ket kameng wenno nagtaud iti progresibo a grupo.
Iti interview ti Bombo Radyo Baguio, kinuna ni Christian Dave Ruz, regional coordinator ti Kabataan Partylist Cordillera ken convener ti The Kasiyana nga adda met dagiti kakadwada nga agtutubo ken organisasyon dagiti agtutubo a nagtaud iti nagduduma nga unibersidad.
Dinakamatna a malidayan ken nabutngan dagitoy iti isyu ti ‘red tagging’ kadagiti community pantries nangruna kadakuada a progresibo a grupo nupay saanen daytoy a baro nga isyu kadakuada.
Kinunana a saanda a maawatan no apay a dagiti nasao a kita ti panagbinnadang ket maikkan paylaeng iti ‘malisya’ idinto a makita met a daytoy ket ‘effort’ ti komunidad.
Innayonna a naibangon dagiti community pantries gapu iti kaawan ti ayuda, oportunidad ken iti epekto dagiti parikut iti panagsango iti pandemya.
Inaklon pay ni Ruz nga adda ti orientation kadagiti volunteers-da para iti panaki-am-ammo dagitoy kadagiti agpilpila kadagiti pantries tapnu maamuan ti napasamak kadagitoy.
Innayonna metlaeng a saan a sungbat dagiti community pantries iti agdama a panagrigat ken iti udina ket nasken a kiddawen ti ayoda ken suporta ti gobyerno kas paset ti karbengan dagiti umili.
Dinakamatna a paset ti ar-aramidenda iti community pantry ti mangipalawag kadagiti umili no anya dagiti karbenganda ken no anya dagiti programa ti gobyerno a mabalin a pagnumaran dagitoy.
Kabayatanna, idi kalman agingga inton Miyerkoles ket agturong ti community pantry dagitoy kadagiti innem a napilida a barangay ditoy Baguio ken inton Huwebes ken Biyernes ket agsublida sadiay Igorot Park.
