![](https://img.bomboradyo.com/baguio/2020/08/returning-ofws-5.jpg)
BAGUIO CITY – Agtultuloy ti panangasistar ti Overseas Workers Welfare Administration (OWWA) kadagiti returning OFWs pasubli iti pagtaengan dagitoy iti nagduduma a paset ti rehion Cordillera.
Maibar iti datus ti OWWA-Cordillera idi July 29 ti agdama a tawen, nasuroken iti 2,000 a returning OFWs na naasistaran dagitoy.
Karaman ditoy ti nasurok 1,600 a returning OFWs iti sidong ti Uwian Na Program ti ahensia, kabinnadangda ti Philippine Coast Guard.
Manipud kadagiti pakabuklan a natulongan a returning OFWs iti Cordillera, 242 kadagitoy ti taga-Abra, 76 ti taga-Apayao, 884 ti taga-Baguio City, 477 ti taga-Benguet, 140 ti taga-Ifugao, 125 ti taga-Kalinga ken 75 ti taga-Mountain Province.
Nupay kasta, 23 kadagiti returning OFWs iti rehion ti nagpositibo iti COVID-19.
Kabayatanna, naaprobaran metten ti 2,295 nga aplikasyon dagiti returning OFWs iti rehion para iti DOLE-Abot Kamay ang Pagtulong (AKAP) a tulong pinansial para kadagiti OFWs a naapektaran ti COVID-19.
Dumanon met iti 77 dagiti saan a naaprobaran, 244 ti DSWD pre-qualified beneficiaries, 186 dagiti nakapila paylaeng gapu iti kinakurang dagiti documentary requirements ken 643 dagiti maipoproseso.
Manipud met idi March 5 agingga April 15, naipaayen ti P10,000 financial assistance kadagiti 454 nga OFWs a naapektaran iti travel ban sadiay China, Macau, Taiwan ken Hongkong gapu iti COVID-19.