BAGUIO CITY – Kumpirmaren ti Department of Agriculture (DA)-Cordillera ti maipadpadamag nga impangato dagiti negosiante sadiay Metro Manila ti presio dagiti nateng nga agtataud iti probinsia ti Benguet.
Maibasar iti report a naawat ti Benguet Farmer’s Marketing Cooperative (BFMC), irasrason dagiti negosiante sadiay Manila ti andap isut gapuna a ngimmina dagiti nateng nga ilaklakoda.
Nupay kasta, impetteng ni Robert Domoguen, public information officer ti DA Cordillera, a bassit laeng ti epekto ti frost wenno andap kadagiti mula a nateng.
Kinunana nga agtaltalinaed nga umdas ti suplay ken natalged ti presio dagiti nateng uray apektado ti probinsia kadagiti naglabas a bagyo.
Impettengna a saan a nainkalintegan ti panangingato dagiti negosiante sadiay Manila iti presio dagiti highland vegetables gaputa nakakaasi dagiti mannalon ditoy lokalidad a bassit laeng ti mapaglaklakwanda bayat a gungundawayan dagiti negosiante ti panagbaba ti temperatura iti nasao a probinsia.
Immuna iti daytoy, kiniddaw ti BFMC ti tulong ti DA-Cordillera ken Department of Trade and Industry para iti pannakamonitor ti presio dagiti nateng nga agtataud ditoy lokalidad a mailaklako iti nagduduma a lugar ditoy pagilian.
Impetteng ni Agot Balanoy, ti general manager ti BFMC a dagiti retailers ti mangipangpangato iti presio dagiti nateng, saan ketdi a dagiti wholesalers.
Impanamnama met ti DA ti dagus a panagtignay dagitoy tapno masolusionan ti nasao a parikot tapno saan a maapektaran ti industria ti nateng iti probinsia ti Benguet.
Mainiag iti daytoy ket agrikrikos dagiti kameng ti DA-Cordillera iti nagduduma a munisipio ti Benguet tapno maammuanda ti epekto ti andap kadagiti mannalon para iti pannakaipaay ti kaskenan a tulong kadagitoy.
