Nabilin dagiti hotel ken dadduma pay a pagdagusan a pasdek iti siudad ti Baguio a mangibangon wenno mangi-upgrade iti bukodda a wastewater treatment systems sumagmamano nga oras sakbay ti Holy Week break.
Daytoy ket kasaruno iti pammilin iti national regulator nga isina dagitoy iti daan a sewage treatment plant (STP) iti siudad.
Gaputa a maibilbilang iti 2016 Baguio Environment Code ti STP kas maysa a domestic treatment system, nagdesision iti Environmental Management Bureau (EMB) iti sidong ti Department of Environment and Natural Resources a kasapulan nga “i-disconnect” dagiti commercial establishment a kas iti hotel tapno makessayan ti dadagsen iti nasurok uppat a pulo a tawen nga STP, sigun kenni city environment officer Rhenan Diwas.
Sigun pay iti lokal a paglintegan iti aglawlaw, ti dadakkel a hotel nga agar-aramid iti wastewater a labes iti 12 cubic meters iti tunggal aldaw ket kasapulan a mangikabil iti bukodna nga STP systems.
Kinuna metlaeng ni Diwas a manarimaan ti panagbiruk iti lokal a gobierno it P1.2 bilyon a pondo manipod iti Tourism Infrastructure and Enterprise Zone Authority (TIEZA) ken iti Department of Public Works and Highways tapno mapasayaat ti daan a pasilidad.
Nagkiddaw met iti tulong iti City Council ti Hotels and Restaurant Association of Baguio, kadua dagiti operator iti transient houses ken dormitories, kalpasan a nakaawat iti abiso manipod iti opisina ni Diwas.
Nakalanad iti abiso a kasapulan nga i-modernize dagiti hotel iti STPs dagitoy tapno sumurot iti standard iti EMB sakbay ti Agosto 31, bayat a dagiti hitel nga awanan iti STP ket kasapulan a mangibangon sakbay iti Disyembre 31.
Inyebkas met dagiti pannakabagi ti dua a hotel–ti Venus Parkview Hotel ken Hotel Cosmopolitan, a ti napartak a panag-upgrade wenno panangibangon iti wastewater systems ket dumanon iti nasurok P3 milyon tunggal hotel ken agkasapulan pay iti kanayunan a personnel a paglainganna iti wastewater management.
Ti Baguio STP nga agtawenen iti 40, a nalpas idi 1986 iti kompania ti Hapon a Tobishima, ket orihinal a naidisenio tapno mangiproseso iti 8,600 cubic meters iti wastewater.
Ngem gapu iti panagdakkel iti populasion ken epekto iti nakaro a panawen, dumanon iti nasurok 12,000 cubic meters ti wastewater nga agay-ayus iti daytoy—labes iti kapasidad daytoy.
Numan pay pagtataudan daytoy iti uppat a system iti karayan ti Baguio, dagitoy ket makapaspasar iti polusion gapu iti nakaro a saan a naiproseso a wastewater, nangruna iti panawen iti napigsa a tudo ken gapu iti kinakurang iti nasayaat a septic tank system para iti dakkel a paset iti populasion iti siudad.
