Kinontra ti nagduduma a labor groups ti pormal a panangipatumpal ti four-day workweek kadagiti ahensiya ti gobyerno pakairamanan kadgaiti korte a nangrugi ita nga aldaw.
Sigun kadagiti labor groups, saan a solusyon iti krisis ken mangitunda laeng ti rigat kadagiti agarup maysa milyon a order (JO) ken contract of service (COS) workers ti gobyerno.
Inlawlawag ni Santiago Dasmariñas Jr., presidente to Confederation for Unity, Recognition and Advancement of Government Employees nga iti sidung ti no work, no pay policy dagiti Job Order ken Contract of Service workers isu’t gapunna a maaektaran launay dagiti panggedan dagitoy.
Insingasing ni Dasmariñas ti temporaryo a pannakaikat ti excise tax iti petrolyo ken value-added tax kadagiti basic needs ken services.
Kagiddan dayta, insingasing ti Trade Union Congress of the Philippines (TUCP) kenni President Ferdinand “Bongbong” Marcos a papartaken ti P200 wage hike ken ibilinna ti panangipaay iti emergency cost-of-living allowance kadagiti Pilipino.
Ti nasao a baro a work setup ken mailinya iti Memorandum Circular No. 114 ni President Ferdinand Marcos, Jr. kas addang tapno makatipid iti enerhiya gapu iti epekto nga ituntunda ti mannarimaan a tensyon idiay Middle East. //BomboKCS
