Maur-uray paylaeng nu isubli iti Hamas ti bagi dagiti nabatbati pay a pimmusay nga Israeli hostages.
Iti agdama, dua paylaeng a bangkay ti kawtibo ti naisubli idiay Israel.
Iti naangay nga state ceremony, inkari ni Israeli Prime Minister Benjamin Netanyahu a maisubli kadakuada dagiti agtaltalinaed nga iggem iti Hamas ken ipapatina nga ipaayan iti pressure ti nasao a militante a grupo tapno agtungpal iti nakalanad iti initial phase iti ceasefire.
Iti met benneg iti Hamas, impanamnamada a sitatalinaed a “committed” daytoy iti ceasefire deal ken ti panangikagumaanda nga isubli ti bagi dagiti pimmusay a kawtibo.
Kagiddan dayta,inakusaran ti Hamas ni Netanyahu a daytoy ti makalaplapped iti panakasarak ti bagi dagiti nabatbati a kawtibo gapu ta saanna a palpalubusan ti iseserrek dagiti heavy machinery ken diggers iti Gaza Strip tapno marekober dagiti bagi.
Kabayatanna, iti panakiuman iti Bombo Radyo kenni Elena Firestein, maysa a Pilipino nga agnanaed idiay Israel, kinuna a saandan a makarikrikna kadagiti bomba a maipatpatayab manipod kadagiti Hamas gapu ta saanen makadanon dagitoy iti nasao a lugar.
Nupay kasta, adda latta dagiti daduma pay a pagtataudan iti rocket kas kadagiti Houthi manipod Yemen.
Sigun kenni Firestein, agtaltalinaed a mabanbantayan dagiti boarder nangruna iti West Bank tapno maliklikan ti panagserrek dagiti terorista a mangpapatay iti siasinoman a kayatda a papatayen.
Mainaig iti dayta, kinuna ni Firestein nga awanen dagiti Pilipino nga iti agdama ket kayatnan ti agawid.
