BAGUIO CITY – Kiniddaw ti lokal a gobierno ti siudad ti Baguio ti panangpondo ti Department of Labor and Employment (DOLE) iti maikadua a rikos ti Tulong Panghanapbuhay sa Ating Disadvantaged / Displaced Workers (TUPAD) Program.
Sigun kenni Baguio City Mayor Benjamin Magalong, masapul ti nasurok P8 million a pondo para iti nasao a programa a maipaay iti 2,300 a workers ditoy siudad a naapektaran iti COVID-19 pandemic.
Impanamnama met ni DOLE-Cordillera Regional Director Exequiel Guzman a maadal no kasano a maipangruna ti kiddaw ti lokal a gobierno.
Immunan nga inwaragawag ti DOLE a mabalin a maikonsidera ti kiddaw ti lokal a gobierno iti sidong ti regular a TUPAD Program kas paset ti post-COVID recovery intervention.
Maipalagip a nagnumar iti umuna a rikos ti TUPAD program ti nasurok 1,240 nga apektado nga empleado ditoy siudad ti Baguio City.
