Impaganetget dagiti lider iti transportasion ti panawagan a maibasura iti linteg iti oil deregulation, a sigun kadakuada ket napaay a mangitunda iti nababbaba a presio iti tengnga iti panagadu dagiti kameng iti industria.
Daytoy ket bayat iti multisectoral forum a naisayangkat idi Marso 21 nga inorganisar iti Piston-Metro Baguio ken ti progresibo a Tongtongan ti Umili.
Sigun kenni Mike Cabangon iti PISTON ken Kilusang Mayo Uno (KMU), panggep iti forum a pagkaykaysaen dagiti rekomendasion, karaman ti dagos a rollback iti presio iti lana ken ti panangkessay iti buis iti gasolina.
Kinuna met ni Carlito Wayas, maysa a lider iti PISTON, a saanda nga umanamong iti deregulation law idi naipasa daytoy sumagmamano a dekada ti napalabas, ngem saanda nga inkankano ti danagda.
Kabayatanna, kinuna met iti grupo a PARA – Commuters Network a saan a rumbeng a pagbanggain dagiti drayber ken commuter, gaputa agpada dagitoy a naapektaran iti nangato a gastos iti gasolina.
Sigun iti grupo, kasapulan a maipangato iti plete tapno mapagtalinaed ti operasion iti transportasion, ngem rumbeng a maigiddan daytoy iti panagngato iti sueldo tapno matulungan dagiti commuter a makagiddan iti panagngato iti gastos.
Nagballaag metlaeng dagiti stakeholde iti posible nga epekto daytoy iti suplay iti taraon.
Sigun met kenni Sofia Villanueva, maysa a vendor iti Baguio Public Market, apektado metlaeng dagiti mannalon iti nangato a gasto iti gasolina para iti irigasion, panagapit, ken ti transportion, a mabalin a makaapektar iti suplay iti merkado.
Inyebkas metlaeng dagiti drayber ti pannakaalarmada seknan iti programa a subsidia iti gasolina, a sigun kadakuada ket narigat a ma-access ken kasapulan ti oras ken kanayunan a gastos iti dokumentasion.
Sigun kenni Josefino Bautista, maysa a drayber iti jeepney, ti panagaplikar para iti subsidia ket magbusbos iti oras a rumbeng kuma a busbusbusenda iti inaldaw a panagbiaheda.
Sigun kadagiti nakipaset, kasapulan ti structural reform ken nabayag a polisia tapno marisut ti agtultuloy a panagngato iti presio iti lana ken ti epekto daytoy iti nagduduma a sektor.
