Namnamaen ni Engr. Charles Bryan Carame, dadadulo ti City Disaster Risk Reduction Management Office ti pannakainayon ti fire safety kas subjects dagiti elementary ken high school students.
Kinunana daytoy bayat ti naipatungpal a fire square roadshow itay kanikadua.
Sigun kenkuana, napateg daytoy a mainayon iti subjects dagiti tapno agbalinda a fire safety advocates.
Malaksid iti dayta, kinuna pay ni Engr. Carame a malaksid iti pagadalan a pakasursuruan dagiti ubbing, inyunay-unayna ti kinapateg ti fire safety education dagiti ubbing iti pagtaenganda.
Sigun kenkuana, ti fire safety ket mangrugi iti pagtaengan gapu ta saan met a kasapulan nga italek amin ti fire safety kadagiti kameng ti Bureau of Fire Protection.
Impaganetget pay daytoy a dakkel ti posibilidad a maliklikan ti uram la ketdi ammo dagiti tao ti ar-aramidenda ken nakasaganada nu adda ti mapasamak nga uram.
Inyebkasna metlaeng a nu mamingsan ket mangrugrugi ti parikut iti pagtaengan gapu ta kurang ti impormasyon dagiti ubbing ken kasta met dagiti nagannakda seknan iti fire safety.
Gapu iti dayta, inyunay-unayna a ti safety ken preparedness ket prayoridad ken responsibilidad ti amin no sadino daytoy ket maysa a collective effort a kasapulan ti kooperasyon ti komunidad.
