Maisingsingasing iti House of Representatives ti maysa a gakat a mangpalawa iti maternity benefits para kadagiti babbai nga empleyado iti informal economy.
Iti sidong ti House Bill No. 9904, nga inpila ni ML Party-list Representative Leila de Lima, makidkiddaw ti naan-anay a pannaka-adaptar ti Senate Bill No. 1579 a mangipaay iti maminsan a maternity cash benefit iti tunggal panagpasngay kadagiti empleyado a babbai a saan a miembro ti Social Security System (SSS).
Sigun kenni de Lima, babaen iti panangipaay ti optimal maternal healthcare a maitunos iti Sustainable Development Goals, saan laeng a masalakniban ti karbengan dagiti inna no di ket masigurado ti panagbiag ken panagdur-as dagiti ubbing a Pilipino.
Katupag daytoy ti 44 nga aldaw a gatad ti daily minimum wage iti rehion a pagnanaedan ti ina.
Iti naisingasing nga addang, maipaay ti cash benefit babaen iti panangimanehar ti Department of Social Welfare and Development (DSWD).
Kabayatanna, agtaud ti pondo manipud iti excise tax kadagiti sweetened beverages, alcohol, tobacco products, heated tobacco products, ken vapor products a mabalin a manayunan iti sidong ti General Appropriations Act (GAA).
