BAGUIO CITY – Mapunpuntirya iti pannakapadur as ti turismo ken agrikultura iti munisipyo ti Atok, Benguet.
Iti interview ti Bombo Radyo Baguio ken 1st Councilor Edward Haight, maysa kadagiti panggepna a tutukan iti pannakapadur as ti turismo sadiay iti kanito a mapagasatan a maipaima kenkuana ti committee iti turismo
Kinuna a tutukanna iti pannakaisimpa ti tourism code ti munisipyo tapnu makolektar nga usto dagiti environmental fees kadagiti amin a pagpasyaran sadiay
Inlawlawagna a babaen iti daytoy ket dakkel ti maurnong kadagiti fees a makatulong iti pondo ti munisipyo a maaramat iti pannakapasayaat ti turismo ken proyekto kadagiti babbarangay
Malaksid iti dayta, kinunana a maysa pay a parikot iti industriya ti turismo sadiay ket iti kinakurang dagiti balay pagdagusan a mabalin a pagturungan dagiti turista
Gapu iti dayta, panggepna a makaguyuguy iti pribado a sektor tapnu adda iti mangpondo iti homestay sadiay
Kabayatanna, kinunana a maysa pay a nasken a matutukan sadiay ket iti pannakapadur as ti agrikultura
Imbinsana a kangrunaan a parikot sadiay iti sektor ti agrikultura ket iti kinakurang ti maipapaay nga assistance kadagiti mannalon tunggal malpas iti maysa a kalamidad
Malaksid iti dayta, imbutaktakna a bassit ti pondo ti munisipal agriculture ti Atok rason a saan a matutukan dagiti pagkasapulan dagiti mannalon
Gapu iti dayta, kinunana a padasenda a papigsaen iti pannakibinnadangda kadagiti maseknan nga opisina partikular iti regional office ti Department of Agriculture para iti kanayunan a pondo para iti daytoy
Innayunna pay a panggepda a maisakad iti panagbalin a standard dagiti presyo ti nateng ken masolusyonan ti mapagparparikutan a smuggling kadagiti natnateng
