BAGUIO CITY – Manarimaan ti pannakaadal ti panagbalin a tourist attraction ti paragliding activity iti municipio iti Mankayan, Benguet partikular iti Lepanto Airstrip.
Sigun ken Mankayan Mayor Frenzel Ayong, dakkel ti potensyal nga agbalin daytoy kas tourism site apaman a malpas ti umno a pannakaadal daytoy.
Kinunana nga immunan a nagturong sadiay dagiti paragliding expert ken balligi a naisayangkatda ti tallo nga attempt iti paragliding.
Dinakamatna a manamnama nga agsubli dagiti paragliding experts tapnu ipadasda iti paramotor wenno paragliding motor inton sumaruno a bulan.
Inlawlawagna nga isayangkatda daytoy tapnu ipadas ken maammuan ti kaadayo ti madanunda manipod iti starting point dagitoy sadiay Lepanto airstrip.
Mainaig iti dayta, inpanamnmana a natalged ti lokasion daytoy para iti nasao nga aktibidad
Innayun ti mayor a kasapulan laeng a maputed dagiti sanga dagiti dadakel a kayo tapnu saan a mangitunda iti aksidente kadagiti paragliders.
Sigun pay ken Ayong, agserbi a landing site dagiti paragliders ti rehabilitated dam sadiay Proper Paco a maysa kadagiti pakaur-urnungan dagiti kabalyo para iti kanayunan a tourism activity.
Imbinsana pay a dakkel a tulong daytoy kadagiti local residents sadiay nangruna iti livelihood dagitoy gapu ta mangipaayda iti panagsanay tapnu dagitoy a mismo ti agserbi kas piloto ti paragliding activity.
