Impasigurado ti Partido Demokratiko Pilipino (PDP) a nakasagana dagitoy a tumulong kenni Sen. Ronald Dela Rosa iti anyaman a wagas ken gundaway.
Sigun kenni PDP Deputy Spokesperson Ferdinand Topacio, maysa ni Dela Rosa kadagiti natan-ok a kameng ti partido kas maysa nga opisial ken maysa kadagiti tallo a senador a mangibagi iti grupo.
Gapu iti dayta, nakasagana ti PDP nga ipaay ti amin a tulong a kabaelan ti maysa a political party, anya man nga oras.
Impetteng ni Topacio nga agtaltalinaed a sibubukel ti suporta ti PDP para iti sigud Chief ti Philippine National Police, iti baet ti agdama a kasasaad daytoy.
Kabayatanna, kinondinar ni Topacio ti maulit-ulit nga ibagbaga ni Ombudsman Jesus Crispin Remulla nga adda ti arrest warrant ti International Criminal Court (ICC) kontra iti senador.
Sigun kenkuana, panaglabsing daytoy iti soberanya ken iti panagwaywayas ti pagilian.
Maipalagip a nasurok maysa a bulan a saan a dimardar-ay ti senador iti Senado, kasaruno ti imbutaktak ni Ombudsman Remulla nga arrest warrant kontra kenkuana.
