Nilapdan ti Bureau of Immigration (BI) ken Department of Migrant Workers (DMW) ti maysa a pasahero a dandani a pumanaw iti pagilian babaen iti palso a travel documents.
Sigun kadagiti immigration authorities, nakemmeg ti suspek gapu iti BI ken DMW database systems.
Babaen iti database systems, ad-adda a nainget a malapdan dagiti undocumented workers ken biktima iti human trafficking.
Impeksa ni Immigration Commissioner Joel Anthony Viado a pinadas ti lalaki a pasahero nga umikkat iti pagilian babaen iti panagaramatna iti bogos nga Overseas Employment Certificate iti Ninoy Aquino International Airport (NAIA).
Naituding nga aglugan ti suspek iti Cebu Pacific flight a paturong sadiay Hong Kong.
Nupay kasta, balligi a nalapdan daytoy ken agtultuloy ti kanayonan nga imbestigasion.
Patien dagiti otoridad a naala ti palso a dokumento babaen kadagiti illegal online sellers a mangpun-puntiria kadagiti aspiring overseas workers.
