Inbabawi ni Senator Imee Marcos ti bidyu nga inpresenta na idiay plenary session ti Senado idi kalman seknan iti maatap a “Charter Change” nga adda pakainaiganna iti national election inton 2028.
Iti nasao nga sesyon, inpresenta ti senadora ti maysa a video a mangiwarwaragawag iti alegasyon kontra kadagiti kaduana a senador no sadino pangpanggependa ti Cha-Cha tapno saan a matuloy ti national election inton 2028 ken mailaylayon pay ti mannarimaan nga administrasyon.
Nupay kasta, dagus daytoy a binabalaw dagiti miyembro ti minority bloc ken inawaganda a ‘fake news’ ken malisyoso ti nasao a presentasyon.
Pinaglibakan met ni Senador Migz Zubiri ti linaon ti nasao a video ken impettengna a saan kuma a iraman dagiti dadduma a senador kadagiti nasao nga alegasyon.
Kalpasan iti addu nga argumento, nagdesisyon ni Imee Marcos nga ikaten ti inpresentana a materyales ken inyebkasna a nasakitan daytoy iti nagbalin a reaksyon dagiti kadauna a senador.
“Nakaka-offend din kasi yung mga sinasabi ng ilang senador tungkol sa akin na sadyang sinungaling… lahat ng lumalabas sa bibig ko ay all BS, outright lies,” sigun kenni Senator Marcos.
Iti baet dayta, inpaganetget ti senadora ti kiddawna a siguradoen nga awan ti term extension ken matuloy ti panagbutos inton 2028.
“Kapalit niyan, ipangako natin lahat sa ating taumbayan na walang term extension na mangyayari at may eleksyon sa 2028,” sigun kenkuana.
Dagos met nga inmanamong ni Senator Zubiri. Sigun kenkuana, aminda ket kayatda a matuloy ti eleksyon inton 2028. //bombokaren.c.sapirao
