Inyebkas ti lima a mahistrado ti Korte Suprema ti dissenting opinion dagitoy seknan iti nagbalin a desisyon ti Korte Suprema nga ibasura ti kiddaw ni Senator Ronald Dela Rosa a temporary restraining order (TRO) wenno status quo ante order (SQAO) seknan iti pannakaiserbi ti warrant of arrest kontra kenkuana.
Karaman kadagiti nasao a mahistrado da Associate Justices Ramon Paul Hernando, Amy Lazaro-Javier, Henri Jean Paul Inting, Ricardo Rosario, ken Antonio Kho Jr.
Sigun kenni Associate Justice Ramon Paul Hernando, awan ti agdama a domestic judicial process ti managpalubos iti panag-aresto kenni Sen Bato. Patien pay daytoy nga awan ti hurisdiksyon ti International Criminal Court (ICC) nga agimbestiga gapu ta nangrugi ti imbestigasyon kalpasan a naglusolos ti Pilipinas manipud ICC.
Innayon pay ni Hernando a “zero guarantee” ti saan a dagos a panangipatulod kenni Senator Bato idiay The Hague.
Sigun met kenni Associate Justice Amy Lazaro-Javier, kasapulan a saan a nakadepende iti personalidad wenno politika nu di ket iti nauneg nga panagsukimat sakbay a bigbigen ti direktiba manipud international court.
Patien met ni Associate Justice Henri Jean Paul Inting a kasapulan ti status quo ante order tapno saan a maawan ti kaipapanan ti kaso nu maiserbi ti arrest warrant kontra kenni Senator Bato.
Kabayatanna, impetteng met ni Associate Justice Ricardo Rosario, kwestionable ti panagaresto iti maysa a nabutosan nga opisyal ti Pilipinas gapu iti warrant ti maysa nga international tribunal.
Patien met ni ni Associate Justice Antonio Kho Jr. a naipaay amin ni Sen Bato dagiti rekisito tapno maipaay kenkuana ti temporary restraining order (TRO) wenno status quo ante order (SQAO).
Iti baet dayta, agtaltalianed latta ti desisyon ti Korte Suprema a saan a patgan ti kiddaw ni Sen Bato a proteksyon kontra iti panagaresto ti International Criminal Court kenkuana. //bombokaren.c.sapirao
