Manarimaan itan ti panagturong dagiti pasahero kadagiti bus terminals iti Baguio City tapno agawid iti bukodda a probinsia para iti eleksion.
Adda dagiti immuna a nagbiyahe kadagiti napalpalabas nga aldaw,bayat nga adu pay ti naobserbaran nga agpilpila agingga iti agdama ken manamnama nga agtultuloy daytoy kadagiti sumarsaruno nga aldaw.
Mainaig iti daytoy, adda met iti naobserbaran a negatibo nga epekto ti panakasuspindir ti operasyon iti Solid North Bus, nangruna iti parte dagiti driver gapu ta naksayan ti pwersa dagitoy kasta metten a naksayan ti bilang dagiti agbiahe a bus.
Iti baet dayta, ar-aramiden dagiti dadduma pay a bus operators ti kabaelanda tapno maipaay ti umno serbisyo ken maakomodar amin a pasahero.
Iti panakiuman iti Bombo Radyo kenni Manny Ronquillo Mañacal, Field Supervisor ti maysa a bus company idiay Governor Pack Road, Baguio City, regular a mangipatpatungpal dagiti otoridad iti inspeksyon kadagiti terminal nangruna nu adu dagiti manamnama nga agbiahe.
Sigun ken Mañacal , kanayon a palpalagipanda dagiti driver seknan iti nagduduma a patakaran wenno pagalagadan mainaig iti panagbiyahe.
Maipalagip nga impakaammo ni Transport Secretary Vince Dizon idi May 2 ti 30 nga aldaw a panakasuspindir iti operasyon ti Pangasinan Solid North Transit, Inc. wenno mas am-ammo kas Solid North Bus, kasaruno ti napasamak nga aksidente a nakairamanan ti maysa kadagiti unit daytoy idiay Subic–Clark–Tarlac Expressway iti Tarlac, a nangitunda iti ipupusay dagiti sangapulo nga indibidwal ken panakadangran iti nasurok a tallopulo a pasahero.
Kasaruno dayta, impanamnama met ti nasao a bus company ti panagtulnogda iti pangngeddeng ti Department of Transportation.
Ti Pangasinan Solid North Transit, Inc. wenno Solid North Bus ket addaan iti regular a biyahe iti City of Pines kas iti Bolinao to Baguio, PITX to Baguio, Cabanatuan to Baguio, Bayambang to Baguio, ken Dagupan to Baguio.
