Inlawlawag ni President Ferdinand ”Bongbong” Marcos Jr. ti pakaseknan maipapan iti pannakapondo ti Philippine Health Insurance Corporation (PhilHealth).
Daytoy ket maysa nga aldaw kalpasan a nalpas ti Korte Suprema (SC) dagiti oral arguments maipapan kadagiti consolidated petitions a mangkidkiddaw ti pannakalapped ti pannakayakar ti sobra a pondo ti Philhealth nga agsubli iti national treasury.
Sigun kenkuana, ad-adu a serbisio manipud iti PhilHealth ti naipaay iti publiko sipud idi napalabas a tawen.
Kinunana a saan a pudno nga awan ti pondo ti Philhealth tapno tulungan dagiti addaan ti sakit.
Impasiguradona nga adda ti Philhealth a mang-assistar kadagiti agkasapulan iti medikal a tulong.
Maipalagip nga idi napalabas a tawen, inremit ti PhilHealth ti P60 billion iti National Treasury sakbay a nangipaulog ti Korte Suprema iti temporary restraining order tapno mapasardeng ti pannakaiyakar ti nabati a P29.9 billion.
Iti petision nga impila ni Senador Aquilino “Koko” Pimentel III, ti Philippine Medical Association, 1SAMBAYAN Coalition, Bayan Muna chairperson Neri Colmenares ken dadduma pay ket kiniddawda iti Korte Suprema a lappedan ti pannakaiyakar ti sobra a pondo ti Philhealth nga aggatad ti P89.9 billion pasubli iti National Treasury.
