Temporaryo a naiyakar ti pwesto dagiti aglaklako iti merkado publiko idiay Atok, Benguet kagiddan ti panakapabaro daytoy.
Iti panakiuman ti Bombo Radyo kenni Atok Mayor Franklin Smith, inaklonna a maragragsakan daytoy iti panakairugi ti lima a kadsaaran a market building.
Sigun kenni Mayor Smith, ti umuna ken maikadua a kadsaaran ket maaramat kas parking area; ti maikatlo ken maikapat a kadsaaran ket agserbi a paglakwan kadagiti nagduduma a produkto; bayat nga agserbi met kas multipurpose hall a pakaangayan dagiti nagduduma nga aktibidad ti maikalima a kadsaaran.
Iti agdama, ti paylaeng phase 1 ti nasao a pasdek ti maar-aramid ken manamnama a maileppas iti las-od ti saan a nabaybayag ngem innem a bulan.
Apaman a malpas ti phase 1 ket impasigurado ni Mayor Smith a maisaruno a dagus a maaramid ti phase 2 gapu ta impanamnama metlaeng kenkuana ti congressman a tumulong daytoy iti nasao a proyekto.
Saan metten a dinakamat ti mayor ti eksakto a kalawa ti nasao a proyekto ngem kinunana nga addaan daytoy ti umdas a kalawa tapno maakomodar dagiti kasapulan daytoy nga iyakomodar.
Ti five-storey public market ket maysa a long-term plan a nairugi dua a bulanen ti napalabas a kasapulan a makompleto iti nasao a lugar kagiddan ti tarigagay daytoy a makaipaay ti nasaysayaat a serbisyo kadagiti turista ken tapno ad-adda a maitandudo ti turismo ti nasao a lugar.// Bombo Rob Dominguez
