Imbilin ti Philippine National Police (PNP) ti pannakadelete dagiti bidyu ken ladawan seknan iti naranggas a pammaltog idiay Ateneo de Zamboanga University Junior High School campus idi Agosti 18 a nangitungda iti ipupusay ti dua nga estudyante pakairamanan ti shooter ken pannakadangran dagiti sumagmamano nga estudyante.
Mainaig iti dayta, imbilin metlaeng ni PNP Chief PGen. Jose Melencio Nartatez, Jr. iti Anti-Cybercrime Group a makikoordinar kadagiti nagduduma a social media platfroms tapno itake down amin a video ken ladawan seknan iti napasamak nga insidente.
Inlawlawag met ti PNP Chief a kayatda a malapdan ti adadda pay a panagwaras dagiti sensitibo a materyal babaen iti panangirepost ken share no sadino mabalin a makita daytoy dagiti menor de edad.
Iti maysa nga statement, impetteng ti heneral a rumbeng a masango ti nasao a pasamak nga addaan iti kinaannad nangnangruna ta maysa a menor de edad ti karaman iti napasamak.
Kinidaw metlaeng ti nasao nga opisyal iti publiko a makipagrikada iti napasamak nga insidente babaen iti panangipakitada iti respeto ken panagbalin a responsable a social media user.
Kagidan dayta, kinidaw daytoy ti pannakaisardeng ti panangishare wenno repost kadagiti video ken ladawan gapu ta mabalin a makaapekto daytoy iti taray ti imbestigasyon ken kadagiti pamilya dagiti biktima. //𝓀𝒸𝓈//
