Nakasaganan ti Philippine Red Cross (PRC) para iti eleksion inton bigat ken naibaonen dagiti agarup 2,000 nga staff and volunteers iti nagduduma a paset ti pagilian para iti midterm elections.
Sigun iti Philippine Red Cross (PRC), naactivate dagiti volunteers daytoy manipod idi May 9 agingga iti May 12 tapno maipasigurado ti kinatalged, kinasayaat ken kinatalna bayat ti panagbotos.
Mangibaon pay ti nasao nga opisina ti 2,260 staff ken volunteers, 28 nga emergency vehicles, 103 foot patrol units, ken 51 mobile units.
Naka-standby metten ti 38 nga ambulansia iti nagduduma a lugar bayat a ti 178 nga ambulansia ti PRC ket nakaalerto kadagiti dadduma a pagilian.
Mangimuntar metlaeng ti PRC iti 291 a first aid stations ken 146 welfare desks iti nagduduma a lugar a kas idiay airports, arenas, barangay halls, bus terminals, PRC Chapters, event places, highways, malls, parks, schools, ken train stations.
Agtalinaed metlaeng a nakaalerto ti 143 volunteers ti Red Cross iti tunggal barangay.
Babaen ti pannakitinnulong ti Phillippine Red Cross iti Commission on Elections (COMELEC), Department of the Interior and Local Government (DILG), ken iti Department of Health (DOH), maipasigurado ti kinatalged dagiti agbotos a Pilipino babaen ti memorandum of agreement a napirmaan idi Marso 27.
