Agtaltalinaed a maud-udi ti Pilipinas no maipapan iti internet connectivity iti Association of Southeast Asian Nations, sigun iti World Bank.
Maibasar iti report ti World Bank a “Better Internet for All Filipinos,” ti internet connectivity ti pagilian ket maud-udi iti affordability, speed ken access no sadino daytoy ti rason ti panakaaramid ti saan a patas a digital participation kadagiti nagduduma a pagilian.
Malaksid iti dayta, ti nakapsot nga internet connectivity ti pagilian ket isu’t agresresulta iti panakapukaw ti oportunidad kadagiti Pilipino.
Sigun iti World Bank, ti average speed ti fixed broadband ti pagilian ket 92Mbps, nabanbannayat no idilig kadagiti daduma a pagilian a Singapore nga addaan ti 264Mbps, Thailand a 216Mbps, Malaysia nga 112Mbps, Vietnam a 105Mbps ken Brunei nga 94Mbps.
Ti Pilipinas met ti maysa kadagiti Southeast Asian a nangato ti cost ti internet connectivityna malaksid kadagiti pagilian a Myanmmar ken Cambodia.
