BAGUIO CITY – Agsagsaganan ti Department of Education (DepEd) – Baguio para iti dry run wenno pilot testing ti distance learning ditoy siudad.
Iti interview ti Bombo Radyo Baguio kenni Councilor Vladimir Cayabas, chairman ti Committee on Education iti lokal a konseho, kinunana a ti pilot test ket insingasing metlaeng ni Mayor Benjamin Magalong.
Kinunana a karaman kadagiti mabalin a pakaisayangkatan ti pilot test iti distance learning ket iti Irisan, Guisad Valley ken kadagiti aadayo a pagadalan iti siudad kas iti Happy Hallow.
Sigun kenkuana, babaen iti addang ket makita ken masukimat dagiti nasken a maaramid tapnu saan a kakaasi dagiti estudyante ken dagiti nagannak iti kanito a mangrugin ti baro a sistema ti edukasyon.
Kabayatanna, dinakamat ni Councilor Cayabas a dumanonen iti 70 percent kadagiti estudyante iti siudad ti naka-enroll babaen iti online ken iti drop box a sistema ti panag-enroll.
Innayonna a maysa a pakakumkumikuman ti DepEd-Baguio ket ti manarimaan a survey kadagiti apektado nga estudyante tapnu maamuan no anya ti wagas ti panagisuro a maiyaplikar kadagiti ubbing.
