BAGUIO CITY – Agtultuloy ti imbestigasyon dagiti pulis iti panakatnag ti maysa nga SUV iti rangkis sadiay Ambangeg, Daklan, Bokod, Benguet a nakatayan ti driver a Pilipino ken nakadangran dagiti lima a pasahero a turista idi malem ti Sabado, July 27.
Sigun iti Bokod PNP, pasalog ti SUV nga addaan plaka nga AKA 6085 a nagluluganan dagiti biktima manipud iti Mt. Pulag ken paturongda iti siudad ti Baguio.
Nupay kasta, killaat a nagdiretso ti lugan iti kanigid a paset ti kalsada agingga a natnag iti rangkis nga addaan kauneg a dumanon ti 400a metro.
Nabigbig dagiti nadangran a turista a da Cheng Wei, 29, baro; Yan Kaihua, 29, naasawaan; Tao Wei, 28, baro; Ji Zilin, 25, baro ken ni Zhu Yazhou, 32, baro, bin-ig a tubo ti China.
Nabigbig met ti driver a Pilipino a ni Jonathan Carnaje a naideklara a dead on arrival iti naisangpet iti Dennis Molintas District Hospital sadiay Daclan, Bokod, Benguet.
Naiyakar dagiti turista iti Baguio General Hospital and Medical Center ditoy Baguio City para iti panakataming ti nasagrapda a nagduduma a dunor iti bagi.
Nagbibinnadang met dagiti pulis ken bombero ti Bokod ken dagiti maseknan nga umili iti panakaispal dagiti biktima.
Agtaltalinaed met ti SUV iti nakapasamakan ti insidente. (-with Bombo Florence Paytocan)
