Pito a pulis ti maibilbilang ita a persons of interest iti panakapaltog ni Kerwin Espinosa ken ti vice mayoralty candidate idiay Albuera, Leyte idi Hueves.
Sigun kenni Philippine National Police spokesperson Police Brigadier General Jean Fajardo, im-imbestigarandan nu maysa nga sniper ti naaramat iti nasao nga insidente.
Maibasar met iti inisyal nga imbestigayson, naglugan iti sports utility vehicle ti gunman a naglibas manipod iti nakapasamakan iti insidente.
Kinamat ngarod dagiti kameng iti pulisya ti suspect agingga iti maysa a compound nu sadino, ditoyda metten a tiniliw dagiti pito a pulis metlaeng a pakairamanan iti dua nga officer ken lima a non-commissioned officers.
Sigun kenni Fajardo, ti kaadda dagiti pulis ti nasao a lugar ket mapagdudua-an gapu ta dagitoy ket agdama a nakadestino sadiay Ormoc Police Station.
Iti agdama, addan iti kustodiya iti Leyte Provincial Police Station dagiti pito a suspect para iti kanayunan nga imbestigasyon.
Kagiddan dayta, narelieve wenno naikkat iti pwesto ti dadulo iti Ormoc City Police a ni Police Colonel Reydante Ariza gapu iti pakaarestar ti pito a kameng iti istasyonna.
Maipalagip a napaltugan ti self-confessed drug lord ken kandidato iti kinamayor a ni Kerwin Espinosa idi April 10 bayat a maang-angay ti maysa a campaign event idiay Albuera, Leyte.
