Inaprobaran ti bicameral conference committee idi kalman nga aramiden a maysa laeng manen ti plaka kadagiti motorsiklo kalpasan a natalantan ti panag-amyendar ti Motorcycle Crime Prevention Act, wenno nalatak iti awag a Doble Plaka Law.
Sigun kenni Senador JV Ejercito, kameng ti bicameral panel, ad-adda a napateg nga maaddaan ti plaka dagiti motorsiklo uray maysa laeng.
Daytoy ket gapu iti agarup siam a milion a backlog iti plaka.
Naikkat metlaeng ti pannakaikabil dagiti Radio Frequency Identification (RFID) stickers kadagiti motorsiklo iti maudi a bersion ti singasing.
Kabayatanna, sigun met iti nangikalintegan iti gakat a ni Senador Francis Tolentino, ti plaka ket maikabil iti likud laeng ti motorsiklo.
Kinuna pay ti senador nga impasigurado ti Land Transportation Office (LTO) a risutenda ti pakaseknan iti backlog dagiti plaka inton June 2025, ngem posible a ti “realistic commitment” ti nasao nga ahensia ket dumanon agingga inton June 2026.
Maipalagip a ti linteg a Republic Act 11235, wenno Doble Plaka idi 2019 ket addaan panggep a mapadakkel ti plaka a maikabil iti sango ken likod ti motorsiklo tapno napartak a maamuam nu naaramat iti krimen.
