BAGUIO CITY – Ipinal ti Commission on Elections, Philippine National Police ken Armed Forces of the Philippines ti plano dagitoy para iti probinsia ti Benguet iti masungad a May 2019 midterm elections.
Iti panakiyuman ti Bombo Radyo kenni Atty. Nicasio Jacob, Provincial Election Supervisor ti Benguet, kinunana nga ipinaldan dagiti dadduma a kurang iti plano para iti election day ken iti panakaiwaras dagiti vote counting machine (VCMs) ken ballot boxes.
Imbingayna a sumangpet inton April 17 dagiti VCMs para iti Baguio ken Benguet bayat nga inton April 28 dagiti official ballots ken dagitoy ket maidulin iti provincial hub sadiay PEZA Compound, Loakan, Baguio City.
Dinakamatna a maiwaras iti nagduduma a munisipyo ti Benguet dagiti election paraphernalia inton May 7 wenno May 8.
Innayonna nga iti kanito a maisangpet iti siudad dagiti nasao nga election paraphernalia ket mangdutokda kadagiti pulis wenno soldado nga agbantay kadagitoy.
Naamuan pay kenni Atty. Jacob a nalpasen ti panagsanay dagiti agserbi nga electoral boards ken dagiti technical support staff bayat a manarimaan ti maysa nga aldaw a panagsanay dagiti support staff dagiti board of canvassers.
