BAGUIO CITY – Mapampanggep ti panakaisubli ti plastic barriers iti uneg dagiti parapasahero a jeep sadiay La Trinidad, Benguet.
Sigun kenni Miguel Luma-ang, manager ti Benguet Operators and Drivers Association, daytoy ket gapu kadagiti reklamo a saanen a masursurot ti 70% capacity iti uneg dagiti jeep a nangikkaten iti plastic barriers dagitoy.
Kinunana nga adda dagiti naawatda a reklamo manipud kadagiti umili gapu iti panakapumpuno ita dagiti jeep nga agbibiahe sadiay nangruna iti minalem ken rinabii.
Sigun kenkuana, adda dagiti dadduma a drivers ken operators a saan paylaeng a nangikkat iti plastic barriers iti luganda ken adda met dagiti sumagmamano a nangikkaten iti daytoy manipud naipatungpal ti nasao nga addang iti siudad ti Baguio.
Inlawlawagna a no maisubli ti plastic barriers kadagiti jeep ti La Trinidad ket mamintinir latta ti 70% capacity kadagiti jeep sadiay.
Immunan nga impabiang ti lokal a gobierno ti La Trinidad kadagiti driver-operators dagiti jeep ti desisyon no ikkaten wenno pagtalinaedenda dagiti plastic dividers iti uneg ti lugan dagitoy.
Nainget met a palpalagipanna manen dagiti kadwada a drivers ken operators ti parapasahero a jeep sadiay La Trinidad iti panangsurotda iti 70% capacity iti panangiluganda ti pasahero.
