Sipapanakel a kinablaawan ni President Ferdinand Marcos Jr. ti Philippine Military Academy SIKLAB-LAYA Class of 2025.
Iti mensahe ni Marcos Jr., kinunana a ti Sundalong Isinilang na Kasangga at Lakas ng Ating Bayan para sa Kalayaan Class of 2025 ket isu ti baro a rupa ti serbisyo nga addaan iti disiplina ket panagayat iti Pilipinas.
Dinayaw met ti presidente ti panagporsege ken dedikasyon dagiti kadete para iti panangituloyda nga agbalin kas soldado.
Daytoy ket iti laksid dagiti gundaway a kinuwestionarda ti bukod-da a bagi no kusto met laeng kadi ti nagbalin a desisyon dagitoy.
Impannakel met ti Commander-in-chief a dagitoy ti kaunaan a grupo a nagsanay iti Pag-asa Island.
Malaksid iti dayta, dagitoy met laeng ti simmali kadagiti international nga aktibidad a nangital-o iti nagan ti akademya.
Gapu iti dayta, mangipakpakita daytoy a dagiti Pilipino a soldado ket nakasagana a mangsango iti sangalubongan nga addaan iti dignidad.
Kararag pay ti presidente nga agserbi dagiti kadete nga addaan iti dignidad, dayaw ken panagayat.
Iti sabali a bangir, manipud kadagiti 266 a kadete a nagturpos, 54 kadagitoy ket babbai no sadino impeksa ti presidente a mangipakpakita daytoy a ti kinatured ken kinalaing ket saan a nakabasar iti sexualidad.
Gapu iti dayta, al-allukoyenna dagiti babbai a sumali pay dagitoy iti linya ti militar.
Innayon ti presidente a ti panagturpos dagiti kadete ket para met iti panakabigbig dagiti nagannak dagitoy, ti panangitulokda a sumrekda iti military kasta met kadagiti amin a timmulong kadagitoy tapno maragpatda ti arapaapda.
