Impasigurado ti Philippine National Police (PNP) nga arestarenda ni Senator Ronald “Bato” dela Rosa iti kanito nga agparang iti impeachment trial ni Vice President Sara Duterte intun Hulyo 6, 2026.
Sigun kenni PNP Public Information Office Chief Col. Allen Rae Co, nakasagana ti pulisya nga ipatungpal ti mandato dagitoy no agparang manen ni dela Rosa.
Maipalagip a sumangsango ni Dela Rosa iti arrest warrant manipud iti International Criminal Court (ICC) gapu iti crimes against humanity a mainaig iti kampania kontra iti illegal a droga bayat ti administrasion ni sigud a President Rodrigo Duterte.
Saan paylaeng a nagparparang ti Senador iti publiko, kalpasan a naipaulog ti warrant kontra kenkuana.
Sigun iti PNP, nakasagana dagitoy a mangipatungpal iti linteg apaman a maduktalanda ti lokasion ti Senador ken no boluntario nga agparang iti aniaman a panagtitipon, pakairamanan ti impeachment trial ni VP Sara.
