BAGUIO CITY – Impalubos ti Tabuk City Inter-agency Task Force (CIATF) ti panakaituloy ti operasyon dagiti parapasahero a bus.
Kasaruno daytoy ti panaka-alarmada iti presensia dagiti colorum a van nga agibibiahe kadagiti pasahero, pastrek ken paruar iti siudad nga awanan ti panangikonsidera kadagiti health protocols kontra iti COVID-19.
Nupay kasta, malimitaran ti operasyon kadagiti ‘point-to-point’ a ruta, partikular ti Tabuk – Manila, Tabuk – Baguio ken Tabuk – Bontoc, Mountain Province.
Napagnumuan metlaeng a saan a maipalubos ti panangibaba ken panagilugan dagiti bus iti pasahero kabayatan ti biahe dagitoy ken dagiti laeng 18-anyos agingga 65-anyos nga agiparang ti negatibo a rapid antigen test result wenno vaccination card ti mabalin nga aglugan.
Kinednganda pay ti panakaipataw ti maximum 72-hour travel time ken maipasidong dagiti pasahero iti quarantine apaman a makasangpetda sadiay Tabuk City.
Mainaig iti daytoy, impetteng ni Tabuk City Mayor Darwin Estrañero a nasken a saan nga aramaten ti publiko ti point-to-point bus operations sadiay tapnu laeng agbiahe para iti panag-aliwaksay gaputa kasapulanda latta nga agannad tapnu awan ti tumaod nga outbreak ti COVID-19 sadiay.
Ibilinna pay ti panakabukel ti pagalagadan tapnu maipasigurado a saan a nakaimet iti virus dagiti pasahero nga aglugan kadagiti point-to-point bus ken ti doble a panagtrabnaho dagiti pulis tapnu matiliw dagiti colorum a van sadiay.
Innayonna a dagiti laeng bus opetors nga addaan ti balido a prangkisa ti mapalubosan nga agbiahe kadagiti nabigbig a ruta ti point-to-point bus operations.
