Maipaayan iti notice of removal dagiti illegal campaign materials dagiti kandidato a maikarga wenno maimuntar kadagiti saan a naituding a poster area.
Dayta ti kiuna ni Atty. John Paul Martin, election officer iti Commission on Elections-Baguio kabayatan ti panakiuman ti Bombo Radyo kenkuana.
Daytoy ket gapu ta sumagmamano laengen nga aldaw ti maur-uray ket mangrugin ti campaign period para kadagiti kandidato iti kinasenador ken kadagiti Partylist inton February 11.
Sigun kenni Atty.Martin, maysa a dakkel a poster ti kandidato iti kinasenador ti naipaayan iti notice of removal agingga inton bigat gapu ta daytoy ket nakakabit sadiay Lower Session Road nu sadino, awanan daytoy iti permit.
Gapu iti dayta, no saan pay daytoy a maikkat agingga inton bigat, mismo a ti senador ti mapaabisoan tapno boluntaryo nga ikkatenna ti nasao a poster.
Sigun kenni Martin, adda ti naituding a 128 a common poster area a mabalin a pagaramidan dagiti kandidato iti structure a pangikabitanda kadagiti poster dagitoy.
Kabayatanna, dagiti makumpiskar nga illegal posters ken maaramat kas ebisdensya para kadagiti “future case.”
Nagpalagip met ti election officer kadagiti kandidato a ti mabalin laeng dagitoy a pangikabitan kadagiti election materialsda ket kadagiti naituding a common poster area ken maiparit kadagiti electric post, kadagiti waiting shed, kadagiti kaykayo ken kadagiti parapubliko a lugar.
Innayon ni Atty. Martin a mabalin metlaeng nga agikargada dagiti materyalesda kadagiti private properties.
Iti sabali a bangir, maaramid ti Operation Baklas Committee a buklen dagiti kameng iti Commission on Elections, Baguio City Police Office ken daduma pay nga ahensya a responsable iti panagikat kadagiti iligal posters ken daytoy ket mainventory.//Bombo Mera Pacpacan
