BAGUIO CITY – Nakasaganan ti Regional Disaster Risk Reduction iti posible nga idadalapos ti bagyo a karding iti Cordillera.
Iti panakiyuman ti Bombo Radyo, kinuna ni Frankie Cortez, Chief Operations Section and Information Officer ti Office of Civil Defense (OCD)- Cordillera, addan dagiti naka-plano nga aktibidad nga ipatungpalda iti kanito nga ag-land fall ti nasao a bagyo.
Sigun kenni Cortez, nasken metlaeng a mangisayangkat dagiti nagduduma nga ahensiya ti gobyerno ken dagiti lokal a gobyerno ti assessment ken ocular inspection kadagiti masakupanda a lugar partikular dagiti narisgo iti panaglayos ken panagreggaay.
Impetteng pay ti opisyal a masapul a maisaganan dagiti evacuation centers ken dagiti family food packs ken non-food items a maipaay kadagiti maapektaran iti kalamidad.
