BAGUIO CITY- Saan pay a marikna ti epekto ti panagngato ti presyo dagiti produkto iti petrolyo kadagiti lako partikular dagiti natnateng iti merkado publiko ti Baguio City.
Sigun ken Manuela Cruz, mangidadaulo iti Vegetable Section ti merkado publiko, awan pay iti ngimmatoan ti presyo kadagiti highland ken lowland vegetables a mailaklako ken agtaltalinaed a nalaka agingga iti agdama ti presyo dagitoy.
Iti agdama, agay-ayam iti P80.00 agingga P150.00 ti presyo ti sweet peas, P30.00 agingga P60.00 ti beans, P180.00 agingga P230 ti sili, P50.00 agingga P100.00 ti lettuce, P50.00 agingga P70.00 ti patatas ken P25.00 agingga P40.00 ti carrots.
Kinunana nga awan pay iti naobserbaranda a nangipangato iti presyo dagitoy nangruna kadagiti agtaod iti lowland a nateng iti baet ti pannakalugida iti transportation costs wenno pannakaibiahe kadagiti nateng.
Kabayatanna, kinunana a ngimmato ti presyo dagiti pasalubong products kalpasan a ngimmato ti presyo ti lard, asukar ken containers a kasapulanda iti panagaramid kadagiti nasao a produkto.
