BAGUIO CITY – Ngimmato ti agpada a presyo ti local ken imported rice iti merkado publiko ti Baguio City.
Iti panakiuman ti Bombo Radyo kenni Jhon Paul Peralta, Rice Retailer, apektado ti local rice gapu ta awan pay ti nagapit kadagiti pagayda iti lowland a pagtataudan ti supply.
Ngimmato metlaeng ti presyo ti imported rice nga agtataud idiay Vietnam, Indonesia ken Thailand gapu iti nangina a presyo ti import.
Iti agdama, magatang ti local rice iti P50 agingga P58 tunggal kilo bayat a magatang ti imported rice iti P60 agingga P65 tunggal kilo.
Impeksa pay ni Peralta a mapilitan dagitoy a mangnayonan iti presyo ti bagas nu maibos ti stockda ken saan a bumaba ti presyo ti import.
Mangnamnama met dagiti retailers ti bagas a pumintas pay ti presyo ti bagas apaman a mangrugi ti panagapit inton Marso.
