Unstable ita ti presyo ti bagas iti Baguio City Public Market gapu iti agtultuloy a panagngato iti presyo ti produkto a petrolyo iti pagilian.
Iti panakiuman ti Bombo Radyo Baguio kenni John Paul Peralta, spokesperson ti rice section ti Baguio City Public Market,imbinglayna a saan a bumabbaba ti presyo ti bagas iti Baguio City nangruna ket nababa ti stocks a sumangsangpet iti siudad.
Malaksid iti dayta, maysa metlaeng a gapuanan iti nangina a bagas ti ngimmato a balor ti pagay a sigun kenni Peralta ket maysa a panagtulnog iti pammilin ni President Ferdinand Marcos Jr. a tulungan dagiti mannalon.
Iti agdama, agay-ayam iti ₱46 aginga ₱52 tunggal kilo ti presyo ti reular-milled rice, ₱54 aginga ₱58 tunggal kilo met ti well-milled rice, bayat a magatang iti ₱60 agingga ₱65 tunggal kilo dagiti imported a bagas.
Kabayatanna, kinuna ni Peralta a dumanon iti ₱100 agingga ₱300 ti ngimmatwan ti presyo iti tunggal maysa a sako ti bagas a katukad ti 25 kilos a sigud a magatgatang iti ₱900 agingga ₱1,100.//Bombo Rob Dominguez
