Awan pay ti naobserbaran a panagbaliw iti presyo ti bagas iti merkado publiko ti siudad ti Baguio iti agdama kalpasan ti panagbaba ti presyo dagitoy idi bulan ti Hunyo.
Iti panakiuman ti Bombo Radyo kenni John Paul Peralta, Rice Dealer iti Baguio City Public Market, agtaltalinaed a magatang iti Php43 agingga Php45 tunggal kilo ti regular-milled rice bayat a magatang met iti Php47 agingga Php48 tunggal kilo ti well-milled rice.
Sigun kenni Peralta, awan paylaeng ti nagbaliwan ti presyo ti bagas kasaruno ti panagdalapos ti bagyong Carina gapu ta naan-anay ken umdas ti stock dagitoy.
Innayonna a nakapagsagana dagitoy a nasayaat sakbay a dimmalapos ti bagyo ken saan unay a naapektran ti produksyon iti bagas kadagiti kabangibang a lugar a pagtataudan ti suplay dagitoy.
Malaksid kadagiti lokal a bagas, bimmaba metlaeng ti presyo ti imported a bagas nu sadino sumagmamano kadagitoy ket magatang iti Php56 tunggal kilo manipod iti sigud a presyo daytoy a Php60.
Iti sabali a bangir, immuna metten nga inkedddeng ti Department of Agriculture a mangrugi ti panakailako dagiti well-milled rice iti Php45 tunggal kilo kadagiti sumagmamano a KADIWA stores ita a bulan.//Bombo Rob Dominguez
