BAGUIO CITY – Bimmaba iti P20 agigga P30 tunggal kilo ti karne ti baboy sadiay Baguio City Public Market
Iti pannakiyuman ti Bombo Radyo Baguio ken Cielo Aglusolos, maysa kadagiti meat vendor sadiay Baguio Public Market, dumanon iti P340 tunggal kilo ti pork chop, kasim, ken ribs, bayat a 350 tunggal kilo ti boneless ken 360 tunggal kilo ti liempo
Kinunana a nangrugi idi napalabas a lawas a bimmaba ti presyo ken ita a lawas a napasaran iti dakkel a bimmabaan ti presyo dagiti nasao a produkto
Inlawlawagna a gapu iti pannakaingato ti presyo dagiti karne ti baboy idi napalpalabas a lawas ket kimmapsot iti panaglako dagitoy
![](https://img.bomboradyo.com/baguio/2021/02/123281897_2814428375549308_6392176997348642930_n.jpg)
Imbinglayna a dagiti sigud a gumatgatang iti maysa a kilo ket gumatangda laengen iti kagudwa ken adda pay dagiti gumatang iti aggatad laeng iti P50
Malaksid iti dayta, kinunana a gapu iti kimmapsot a panaglako dagitoy ket immado ti suplay ti karne iti merkado a maysa a rason ti bimmabaan ti presyo
Gapu iti dayta, kinunana a kasapulanda a mailako dagiti baboy tapnu saanda nga ag-oversize a posible a mangitunda iti nalaklaka pay a presyo dagitoy
Iti baet ti dayta, mangnamnama daytoy a makasubbot dagitoy iti panaglakoda kagiddan iti pannakaibaba ti presyo dagito karne ita a lawas
Mainaig iti dayta, inlawlawagna a maysa a rason iti pannakaingato ti presyo dagiti karne ti baboy idi napalpalabas a lawas ket iti nangina a pananggatangda iti baboy
Kinunana nga agtaod pay sadiay Mindoro ken Mindanao dagiti baboy nga ilaklako dagitoy kasaruno iti saan a panaglako dagiti piggery sadiay Tarlac ken Panggasinan gapu iti pangta ti African Swine Fever (ASF)